（以下是我在四月三十日為歷史學會編寫的早會演講稿，時值奧運將臨，也見一電影和一話劇均涉我那演講稿中的題材，特意拿出來與眾人分享。）
歷史學會分享
甲：1892年，「現代奧林匹克之父」顧拜旦提出恢復奧運會，籌備四年，1896年，第一屆現代奧林匹克運動會終於係希臘雅典正式舉行，係奧運會舉辦前，顧拜旦曾向滿清o既光緒帝、李鴻章發出邀請，但係滿清統治者對現代奧運一無所知，所以無任何回應，結果中國與奧運擦身而過。
乙：係一百年前，1908年，大清帝國風雨飄搖，根本無心理會係倫敦舉辦o既奧運會，但係有一份叫《天津青年》o既雜誌，登咗篇題目叫做「競技運動」o既文章，作者提出咗三個喺當年極難解答o既問題：第一係中國何時才能派一位選手參加奧運會？第二係中國何時才能派一支隊伍參加奧運會？第三係中國何時才能舉辦奧運會？一百年喇，我哋國家用咗足足一百年嚟回答呢三個問題。
甲：1931年日本佔領中國東北，搵清廢帝溥儀出嚟搞個滿州國，日本人為咗要得到國際承認，就用滿州國名義替東北短跑名將劉長春、中長跑名將于希渭向1932年o既倫敦奧運會報名，劉長春即時偷走o架，形勢有變，中國就即刻幫劉長春同于希渭報名參加奧運，但又唔出錢支持，最後要由東北大學名譽校長張學良捐一千六百蚊美金贊助劉長春同埋佢教練，加埋一個觀察員，至於于希渭就走得慢，被日本人困係東北。
乙：劉長春喺當時100米最快紀錄係10秒6，喺世界排頭十名o架，但係當時佢大腿肌肉拉傷，又無準備參賽，臨時臨急報名，未醫好又無訓練，仲要搭遠洋船係海上漂泊21日，上到岸唔夠3日，無任何恢復訓練就要參加預賽，係100米預賽頭60米，劉長春一直領先 ,但係到咗70米，佢就俾人追平，到80米俾其他運動員反超前，最後以第5名完成預賽，慘被淘汰。
甲：兩日後，劉長春參加200米預賽，係頭170米，劉長春緊追一位美國跑手，最後30米才被反超前，僅得第4，首輪被淘汰；咁就係中國第一位運動員參加奧運
o既歷史，雖然成績唔係咁好，但劉長春所表現o既民族氣節已經令人敬佩。
乙：中國係1936年派出69名運動員，加埋34人的考察團參加第11屆柏林奧運，當時政府又唔俾錢，要運動員自己籌錢，當時香港出身o既球王李惠堂就帶住好勁
o既香港足球隊喺東南亞週圍踢波籌錢，踢到殘晒，去到參加柏林奧運，第一場對住英國，雖然表現出色，仍然輸兩球。
甲：當年剩係得撐竿跳運動員符保盧入到決賽，最神奇係符保盧自己係無嗰支竹竿o架，訓練同比賽都要週圍問其他國家o既選手借支竹竿，連佢都輸埋，中國第一次派隊伍出賽食蛋而回，之後仲俾歐洲報紙畫漫畫笑我哋係用擔架抬住五隻鴨蛋o既東亞病夫。
乙：等咗一百年，我哋終於回答最後一個問題，北京將係今年舉辦奧運會，但係已經無咁悲情喇，因為我哋已經有選手取得獎牌，第一面奧運金牌係由射擊運動員許海峰攞到。第一面游泳金牌由莊泳攞到，第一面長跑金牌由王軍霞取得，第一面田徑金牌就係由跨欄運動員劉翔奪得，仲有好多好多o既紀錄。
甲：中國奧組委向全世界表明會舉辦一屆有特色、高水準o既奧運會，同一個世界，同一個夢想。我諗全中國人回顧這一段百年歷史，一定會更珍惜2008年o既北京奧運。歷史學會分享完畢。
（首段提及的電影是「一個人的奧林匹克」：
話劇則是香港話劇團的「頂頭鎚」：
